دي مش داتا سيت عادية للتدريب، ده كان مشروع مطلوب من باحث بيحضر رسالة دكتوراه، وكان هدفه يحلل أداء سهم شركة أبل في البورصة الأمريكية من سنة 1980 لحد 2025.
الداتا نضيفة جدا ومفيهاش تعقيدات كتير في الكلينينج، وبتضم عواميد أساسية زي التاريخ، سعر الفتح والإغلاق، أعلى وأقل سعر للسهم، وحجم التداول. بس عشان تطلع منها شغل مظبوط وتفهم رحلة صعود السهم ده، هتحتاج تلعب شوية وتستخرج تفاصيل من التاريخ باستخدام Power Query عشان التحليل الزمني بتاعك يطلع مظبوط.
فخ إياك تقع فيه
أوعى كمحلل تحسب المتوسط الإجمالي لسعر السهم على مدار السنين دي كلها. السهم في بداياته كان سعره أقل من دولار ودلوقتي في 2025 معدي 280 دولار، فلو جبت المتوسط هيطلعلك رقم ملوش أي معنى إحصائيا ولا اقتصاديا وهيبوظلك التحليل كله. فكر كأنك محلل مالي بجد وركز على التريند ونسبة النمو على مدار السنين بدل ما تقع في الغلطة دي.