بص يا بطل، الداتا سيت دي فيها 5000 عملية بيع، وهي معمولة مخصوص عشان نقيم أداء المندوبين ونشوف الفروع شغالة ازاي والمنتجات اللي ماشية في السوق. يعني احنا هنا تركيزنا كله على البيزنس والأداء والفلوس، مش داخلين في حتة سلاسل الإمداد والمخازن.
الداتا دي خام يعني زي ما هي طالعة من السيستم، وده أحلى ما فيها عشان هتخليك تشتغل بإيدك وتعمل شوية تنظيف وعمليات في الاكسيل. هتلاقي عمليات طالعة بالسالب (زي السعر أو التكلفة) ومطلوب منك كـ Data Analyst شاطر إنك تعالجها وتحولها لموجب عشان التحليل بتاعك يطلع مظبوط، لأن مفيش سعر بالسالب. هتلاقي عندك بيانات كاملة زي تاريخ الأوردر، المنطقة، المنتج وتصنيفه، اسم المندوب، الكمية، سعر الوحدة وتكلفتها، طريقة الدفع، حالة الطلب، والعمولة اللي طالعة على البيعة.
نصيحة وأنت شغال
هيقابلك في خانة اسم المندوب Sales Rep قيم مكتوب عليها Unknown. أوعى تفتكر دي غلطة وتمسح الصفوف بتاعتها عشان تنظف الداتا.
بالعكس، الـ Unknown دي معلومة مهمة جداً. دي معناها إن فيه عملية بيع تمت وفلوس دخلت، بس السيستم مسجلش مين اللي باع. دورك هنا كمحلل شاطر إنك متمسحش البيانات دي، لكن تستخدمها في التحليل عشان تبلغ الإدارة إن فيه خلل في السيستم أو في طريقة تسجيل الناس للشغل، وإن فيه مبيعات "تايهة" مش عارفين صاحبها، وده جزء أساسي من شغلك إنك تطلع المشاكل دي مش بس تطلع أرقام أرباح.